Do heff ik mi nu 'n beten rutwunn un heff dann seggt, wenn wi Plattdüütschen dat nu nich mehr köönt un nich mehr weet, dat wär jo man trurig, aver so ganz Unrecht harr he jo nich. Wo köönt wi denn in de Stadt Platt sehn? Wenn se mol graad dorbi sünd en Stroot optoreten, dann is dor so'n Schild "Watt mutt dat mutt" oder du sühst an't Lokol mol "Kiek mol wedder in".
Nu gifft dat aver Stadtdeele, dor warrt dat Platt noch recht flietig snackt un dor is dat sogor Umgangssprook. Bi mien Dischler in Blangnees heff ik dat nülich hört. De oole
Meester hett sien Azubi wat vertellt un de Jung hett denn ok flietig nickkoppt, aver antert hett he natürlich op Hochdüütsch.
Man süht, dat Plattdüütsche is lebennig un unse Novers in Sleswig-Holsteen hebbt in Landdag nun ok den plattdüütschen Gemeenden dat sülve Recht inrümmt, dat de Freesen hebbt, un vun dor kenn ik dat jo ok. De Freesen dröfft al lang eer Schiller för de Strooten un för de Dörper op Freesisch un op Hochdüütsch schrieven.
Un de Kreis Storman will dat nu ok mooken. So könnt de in Tokunft de Nomensschillers an de Stroot in Plattdüütsch un in Hochdüütsch lesen, wenn de Mehrheit in't Rot dat wullt un ok betohlt. Nu mag dat natürlich wehn, dat de een oder anner seggt, wi hebbt doch al noog Schillers in de Stroot, aver we wüllt keen niege Schillers, we wüllt keen tosättlichen Schillers. De oolen Schillers schölt weg un de niegen dorhin.
Un dat weer doch ok mol wat ganz Besünners, wenn an de groten Schillers, de an de Autobohn un an de Landstrooten staht, so 'n lütten Gruß anbummelt ward "Hamborg seggt Goden Dag" oder wat anneres, kann man sik jo über enig warrn. Ik weet, dat de Welt daarvun nich beter warrt, aber villicht ward se 'n beten fründlicher, wenn de een oder annere no Hamborg rinkümmt un süht, dat wi uns över den Beseuk freuen doot, un 'n beten smüüstert.
Leeve Fru Präsidentin, leeve Kolleginnen un leeve Kollegen, leeve Fründ vun de plattdüütsche Sprook! Dat is jo'n fein Sook worden, dat wi jümmers eenmol in de Legislatur hier in't Parlament op Plattdüütsch diskuteert un villicht dorbi ok mol twüschendörch Platt snackt ward.
Dat weur domols, as uns Präsidentin Fru Dr. Stapelfeldt weur. De hett dat in de Reeg kregen, dat wi hier in't Huus vun alle Frakschoonen en Liddmaat in den Plattdüütschen Rot schickt hebbt. Dat weur toletzt vun de Greunen Fru Gregersen, vun de Swatten Kolleg Reinert un vun de Roten weur ik dat.
Nu hett de Plattdüütsche Rot an alle Parteien en Froogebogen oder en Proovsteen schickt, wo ok de Froog vun de Ortsschillers in ankümmt. Nu harr de CDU jo woll mit alle annern snacken kunnt un wi harrn dat tosomen besloten. Avers, dat is Wohlkampf, un denn kannst die ok nich op de plattdüütschen Mackers verloten.
De köönt dat Water nich hollen, wenn en gode Idee vun den Plattdüütschen Rot kümmt. Nu hebbt se dat klaut un nu is dat ehr Idee. Avers egal, dat is Snee vun güstern. Hüüt stimmt wi den Andrag to. Hett jo ok wat för sik, wenn jümmers mol wedder lütt beten Plattdüütsch in't Oog steken deit un uns erinnert, dat dat Plattdüütsch uns Regionolsprook is un de Europäisch Union dat ok so süht. Bi uns Schooln kunn dat seker noch 'n End beter warden, avers in uns Rundfunk 90,3 mit mien Fründ Gerd Spiekermann klappt dat hervorragend un ik meen, he hett den Fritz-Reuter-Pries vun de Karl-Töpfer-Stiftung, de he in April verlehnt kricht, ok bannig verdeent.
Ik mutt nu avers doch noch mol wat enkeldes to den Andrag seggen: Wenn dat heet, "De Senot schall kieken", keen is dor denn tostännig? Is dat de Kulturbehörd, is dat de Schoolbehörd oder is dat noch een anner Behörd? Dor mutt een oppassen. Dat mutt op jeden Fall een vun de Senatoren wehn, bi de Plattdüütsch keen Fremdsprook is.
Un denn dat Beschrieben vun de Schiller, dat gefallt mi. Is dat vun ju politisch meent mit dat "Hamborg seggt Tschüss"? Wenn dormit düsse Senot meent is, dormit weurn wi inverstohn.
Dat schulln wi denn man duppelt ünnerstrieken. Avers ok sünst hebbt wi nix gegen de Schiller bi't Kaamen un bi't Wegfohren. Markt doch de Lüüd, dat bi uns, in uns Hamborg, dat Platt noch to Huus is.
Nu wat över de Schiller vun de Stadtdeele. Dor mutt de Senot villicht tosomen mit den Plattdüütschen Rot mol oplisten, woneem dat goot is un woneem dat Kinnerkroom weur. Nich överall is dat anbröcht un wenn denn blots en Bookstov weniger oder anners schreben ward, schull man sik dat villicht överleggen. Avers holt ju dorto en poor Plattsnackers, de sik dor utkennt, un mookt dat nich so as in unser Naveroort Glinn. Dor weur erst mol en Schild mookt, wiel man sehn wull, wie so watt utsükt. Denn weur dat wedder afmookt un opletzt hett de Bo-Utschuss besloten, dat man dat mit dat Plattdüütsch op dat Ortsschild noloten schull. Dat is ok een Bispeel vun Sleswig-Holsteen, vun dat de CDU in ehrn Andrag snackt, blots annersrüm.
Un dat bi de Nomensschiller de Bezirksversammlungen mitsnacken mööt, dat is doch ganz kloor. Un denn dat Betohlen. Dor mööt jo woll doch 'n poor Stüer-Euros her, denn mit Spenn un Reklame, as man dat in die Schoolbehörd mol diskuteert harr, kann dat nich gohn.
Op de Schiller dröft keen Firmennoomen stohn. Nu heff ik över den lütten Andrag noog seggt. De SPD stimmt to. - Danke vör de Opmerksamkeit.
Fru Präsidentin, miene leeve Lüüd! Nu will ik dat ok mol versöken. Nu hebbt wi de letzte Sitzung vun de Börgerschaft in düsse Legislatur un dor hett de CDU noch gau een Andrag in Plattdüütsch inbracht.
schiller op Platt. So kann man sik natürlich ok in siene Antwoort of de Wohlproovsteen dormit risch mooken, jümmer de Partei to ween, de dat Plattdüütsche in de Debatten in de Börgerschaft inbringt. Un dat hebbt se tatsächlich kott för'n Büxenknopp schafft, as een dat in Platt so seggen deit.
Dat mit de Oortsschiller is ja ganz scheun, aver dat se sik dormit wichtig mooken, dat schulln se mol wirklich looten,
denn de eenzige Frakschoon, de in düsse Legislatur Anfroogen to dat Plattdüütsche stellt hett un froogt hett, wat de Senot mooken deit, um dat Platt ok to bewohren, dat wöörn de Greunen.
Un bi de Anfroogen is rutsuert: Dat mutt noch ganz anners warn. Platt mutt de Kinners in de School un in de Kinnergoorn bibrocht warn, so as dat de Bundesrot för Nedderdüütsch ok fordern deit.
- Dat weet ik, heff ik jo anfroogt, Frau Koop, aver ut de Anfroog is rutsuert, dat dat nich noog is.
Entschuldigung, ich bin nur mit Missingsch aufgewachsen oder wenn überhaupt. Es sind gerade einmal eine Handvoll Kindergärten und an jeder sechsten Schule wird 'n beten Plattdüütsch snackt, dat is nich noog.
Wat de CDU un de Senot bis jetzt mookt hebbt, is nix un ok nich noog, um dat Plattdüütsche to bewohren. Aver dor seggt de CDU nix un will nun allens den Ehrenamtlichen wedder överloten un töft nu ok noch op Spennen, um een poor Ortsschiller mit "Goden Dag ok" un "Hamburg seggt Tschüss" antobummeln.
Een lüttes Teken, aver lang nich dat, woto sik de Senot mit Schrift un Siegel ünner de Europääsch Charta to den Schutz vun de Regionolsproken un Minnerheitensproken verpflichtet hett. Dat gilt för dat Plattdüütsche, aver dat gilt even ok för Romanes, aver dat hebbt se wohl vergeten.
Plattdüütsch is een Stück noorddüütsche Kultur un Kultur smiet man nich even weg, man heegt un man plegt ehr.
Platt op Ortsschiller is een kulturell Signal, dat jüst de Hansestadt goot ansteiht. Dat seggt uns de Fehrs-GildeVerein för plattdüütsche Literatur un Sprookenpleeg un Sprookenpolitik.
Un so ganz nee is de Idee jo man ok nich. Plattdüütsche Ortsschiller un Schiller in de Minnerheitensprooken so as Freesisch gifft dat annerwegens al lang. Ok de "Plattdüütsche Rot vun Hamborg" hett dat annerletzt diskuteert un dor sünd wi mit jede Frakschoon bin'n, un för de CDU